२४ भाद्र २०८१, सोमबार
२४ भाद्र २०८१, सोमबार
काठमाडौँ । चीनको केन्द्र भागमा पर्ने शहर सीआनको प्राचीन नाम हो ‘छाङआन’ । रेसम मार्ग (सिल्क रोड)कै एक हिस्साको रुपमा रहेको यो प्राचीन सहरको नाममा चार दशक अघि यो कम्पनी स्थापना भएको थियो । यसैलाई चीन बाहिर भने ‘चाङआन’ भनिन्छ । चाङआन अटोका अन्य सहायक ब्राण्डहरु पनि छन्, डीपल, अवतार, नेभो र खाइ छङ ।
चीनका प्रमुख चार अटोमोटिभ ग्रुपमध्येको एक हो, चाङआन । उसको लोकप्रिय ईभी ब्राण्ड डीपलले अहिलेसम्म तीन वटा मोडेलमा कार उत्पादन गरेको छ । एल ०७, एस ०७ र जी ३१८ नाम दिइएका यी शानदार गाडीहरु अहिले विश्व बजारमा टेस्लासँग प्रतिस्पर्धा गरिरहेका छन् ।
यिनैमध्येको एक एल ०७ (L07) कार हालैमात्र नेपाल भित्रिएको छ । एसअघि एस ०७ (S07) कारमात्रै नेपाल आएको थियो । उक्त कार नेपाल भित्रिएको ४ महिनामा साढे ३ सयको संख्यामा विक्री भइसकेको छ । यससँगै नयाँ गाडी पनि नेपाल भित्रिएको हो ।
नेपालमा डीपलका गाडी आयात गरी विक्री गर्ने अख्तियारी पाएको ‘एमएडब्ल्यू वृद्धि अटोकर्प’ले नयाँ एल ०७ लाई आसन्न नाडा अटो शोमा प्रदर्शन गर्ने भएको छ । कम्पनीले ६६ लाख ९९ हजार मूल्य तोकेको यो आकर्षक गाडी आगामी नाडा अटो शोको एक आकर्षण बन्ने छ ।
यो कार डीपलको अहिले विक्री भइरहेको एस ०७ भन्दा ८ लाख सस्तो पर्छ । यसले पनि अति आकर्षक यो कारको विक्री बढ्ने विश्वास एमएडब्ल्यूले लिएको छ ।
उक्त नयाँ कार पनि असाधारण सुरक्षा फिचर्सहरुले भरिएको छ । भन्नलाई सेडान भनिए पनि यो ह्यासब्याक कार हो । एस ०७ भने एसयुभी हो । त्यसैले एल ०७ कार अहिले बजारमा उपलब्ध डीपलको एसयुभीभन्दा लामो तर होचो र केही साँघुरो हुने छ । यद्यपि, यो गाडी साढे ६ फुट चौडा र साढे १५ फुट लामो छ । कारको कुल तौल २ हजार ३५ किलो हुने कम्पनीले जनाएको छ ।
एल ०७ मा पनि एस ०७ कै जस्तो ९९ किलोवाट मोटर राखिएको छ भने ६६.८ किलोवाट घण्टा (६६ हजार ८०० युनिट) क्षमताको ब्याट्री जडान गरिएको छ । यो ब्याट्री एक पल्ट फुल चार्ज गरेपछि ५४० किलोमिटर कुदाउन सकिने दाबी कम्पनीको छ । यद्यपि, नेपालको बाटोमा एसी चलाएर कुदाउँदा पनि ४१० किलोमिट कुद्ने कम्पनीले जनाएको छ ।
उक्त ब्याट्री एक पल्ट फुल चार्ज गर्न ६० किलोवाटको डीसी चार्जर प्रयोग गर्ने हो भने १ घण्टामै चार्ज हुन्छ । तर नेपालमा निजी क्षेत्रले बनाएका अधिकांश चार्जिङ स्टेशनहरु ३० किलोवाट क्षमताको भएकाले २ घण्टामा फुल चार्ज हुनसक्छ ।
कार भए पनि यस गाडीको ‘ग्राउण्ड क्लियरेन्स’ १६० मिलिमिटर छ । यसले लामो र छोटो दुबै किसिमका यात्रामा सहज बनाउने कम्पनीले जनाएको छ । डीपलको गाडीमा फ्रेम–लेस सिसाका झ्याल भएको कारण युवाहरुका लागि एक आकर्षण बनेको छ ।
१६ वटा स्पिकर राखिएको यो कारमा साउण्ड सिस्टम पनि असाध्यै राम्रो छ । स्क्रीन त झनै बब्बाल छ । गाडी भित्रै बसेर ३६० डिग्री भ्यू हेर्न सकिने भएकाले यो कार सुरक्षा र मनोरञ्जन दुबैका निम्ति असाध्यै राम्रो छ । यो गाडीलाई साइडबाट हेर्दा यसको सिसाका झ्यालहरु एक सुन्दर युवतीको गाजलु आँखाजस्तै देखिन्छन् ।
थुप्रै क्यामेराहरुले गाडी चलाउन, पार्किङ गर्न मद्दत गर्छन् । धेरै स्वचालित प्रणालीहरु जडान गरिएको यो कारमा चालक गाडी छोडेर टाढा जाने वित्तिकै झ्यालका सीसाहरु आफैँ बन्द हुन्छन् । डिजिटल कन्ट्रोल प्रणाली असाध्यै राम्रो छ ।
लुक्स र फिचर्स दुबैमा अब्बल यो कार नेपाली बजारमा आइसकेको छ ।
नागरिक पोष्ट
