२९ कार्तिक २०८१, बिहीबार
भैरहवा । राष्ट्रिय स्वतन्त्र पार्टीका सभापति रवि लामिछानेले बुधबार जिल्ला सरकारी वकिलको कार्यालय रुपन्देहीमा ९ घण्टा लामो बयान दिएका छन् ।
बुटवलस्थित सुप्रिम बचत तथा ऋण सहकारी संस्था लिमिटेडको बचत रकम अपचलन गरेको अभियोग लागेका पूर्वगृहमन्त्री लामिछानेसँग बुधबार ९ घण्टा लामो बयान लिइएको हो ।
त्यसक्रममा उनलाई प्रहरी अधिकारीकोसमेत उपस्थितिमा ५० वटा प्रश्न सोधिएको छ। तर पहिलो दिन जस्तै रविले आफूलाई लगाइएका आरोपहरूमा इन्कारी बयान दिएका छन् । उनले सबै आरोप अस्वीकार गर्दै अरु कसैले आफ्नो नाममा चेक काटेको र खातामा पैसा हालिदिएको विषयमा आफू जिम्मेवार नहुने बताएका थिए ।
बुटवलस्थित सुप्रिम सहकारीको रकम अपचलन गरेको आरोपमा उनलाई कास्कीबाट मंगलबार रुपन्देहीको भैरहवा लगिएको थियो । जहाँ पहिलो दिनको बयानमा पनि उनले आरोप अस्वीकार गरेका थिए ।
लामिछानेलाई दोस्रो दिन पनि भैरहवास्थित जिल्ला प्रहरी कार्यालयको हिरासतमा राखिएको रुपन्देहीका एसपी रञ्जितसिंह राठौरले जानकारी दिएका छन् ।
नौ घण्टा लामो बयानपछि प्रहरीको घेराबाट हात हल्लाउँदै हिरासततिर रवि
पहिलो दिन बोल्न भ्याएपछि घेरेर सरकारी वकिलकहाँ लगियो रविलाई
जिल्ला न्यायाधिवक्ता प्रेमराज पौडेल, इलाका प्रहरी कार्यालय बुटवलका डीएसपी विजयराज पण्डित, जिल्ला प्रहरी कार्यालयका अनुसन्धान अधिकारीहरू लगायतको उपस्थितिमा उनको बयान गरिएको हो ।
जिल्ला न्यायाधिवक्ता प्रेमराज पौडेल मुलकुी फौजदारी कार्याव्यवस्थाको दफा १६ मा अनुसन्धान अधिकारीले सरकारी वकिलसमक्ष बयान लिन अनुसन्धान अधिकारीले उपस्थित गराएको बताए ।
पोखराको सूर्यदर्शन सहकारीको रकम हिनामिनामा संलग्न रहेको आरोपमा पक्राउ परेका लामिछानेमाथि बुटवलस्थित सुप्रिम सहकारीको रकमसमेत हिनामिनामा संलग्न रहेको आरोप छ ।
जिल्ला अदालत रुपन्देहीले रवि र उनका साझेदार पूर्वडीआईजी छविलाल जोशीसहित १२ जनाविरुद्ध पक्राउ पूर्जी जारी गरेको थियो।
प्रहरीले बुटवलस्थित सुप्रिम ऋण तथा बचत सहकारी संस्थाको १४ करोड २९ लाख रुपैयाँ गोर्खा मिडिया नेट्वर्क प्रालिमा लगेर खर्च गरेको कसुरमा अनुसन्धान गरिरहेको छ ।
बुटवलस्थित सुप्रिम सहकारीबाट एक करोड ९६ लाख रविकै नाममा र १४ करोड २९ लाख रुपैयाँ विभिन्न व्यक्तिमार्फत गोर्खा मिडिया नेटवर्कमा पुगेको संसदीय छानबिन विशेष समिति र प्रहरीको प्रतिवेदनमा उल्लेख छ ।
नागरिक पोष्ट
