२९ कार्तिक २०८१, बिहीबार
भैरहवा । सहकारी ठगी, सङ्गठित अपराध तथा सम्पत्ति शुद्धीकरण मुद्दामा पक्राउ परेका राष्ट्रिय स्वतन्त्र पार्टी (रास्वपा) का सभापति रवि लामिछानेलाई दोस्रो दिन नौ घण्टा लामो बयान लिइएको छ ।
बुधबार बिहान १० बजे कडा सुरक्षाबीच सरकारी वकिलको कार्यालय रुपन्देहीमा लगिएका उनलाई त्यहाँ नौ घण्टा लामो बयानपछि जिल्ला प्रहरी कार्यालयको हिरासतमै फर्काइएको हो ।
पूर्वगृहमन्त्री लामिछानेलाई मंगलबार पहिलो दिन प्रारम्भिक बयान लिइएको थियो । बुधबार दोस्रो दिन बयानलाई निरन्तरता दिएर सरकारी वकिलको कार्यालयबाट हिरासतमा लिएको हो ।
उनलाई बिहान जस्तै अहिले बेलुका पनि प्रहरीले घेरा बनाएर पत्रकार र समर्थकमाझ नदेखिने गरि भ्यानमा हालेको हो । कडा सुरक्षासहित भ्यानमा हालिएका उनले भित्रैबाट हात हल्लाउँदै हिरासततिर गए । त्यसक्रममा सरकारी वकिलको कार्यालयबाहिर जम्मा भएका स्थानीय र प्रहरीबीच भनाभन पनि भयो।
सरकारी वकिलको कार्यालयबाट निकाल्दा पनि ठूलो संख्यामा प्रहरी खटिएका थिए । उनको बयान सकिए नसकिएको सरकारी वकिलको कार्यालयले केही खुलाएको छैन । यद्यपि रवि भने प्रहरी भ्यानमा पनि मुस्कुराउँदै हिरासततिर फर्किए ।
मंगलबार पनि बयानपछि उनलाई जिल्ला प्रहरी कार्यालयमा राखिएको थियो । बुधबार पनि जिल्ला प्रहरी कार्यालयबाटै प्रहरीको कडा सुरक्षामा सरकारी वकिलमा लगिएका उनलाई त्यसैगरि फर्काइएको हो ।
मंगलबार बयानपछि बाहिर निस्कने क्रममा सरकारी वकिलको कार्यालय परिसरमै ‘खोरमा बाघलाई थुन्दैमा स्याल हुँदैन’ भन्ने प्रतिक्रिया दिएपछि माथिको आदेशमा रुपन्देही प्रहरीले घेरा हालेको हो ।
पोखरा र रुपन्देहीमा एकै प्रकृतिको कसुर भए पनि जिल्ला र संस्था फरक–फरक भएकाले हरेक जिल्लामा लामिछानेबिरुद्ध छुट्टाछुट्टै मुद्दा दर्ता हुने रूपन्देही प्रहरी प्रमुख प्रहरी उपरीक्षक रञ्जितसिंह राठौरले बताए।
‘जति जिल्लामा उजुरी दर्ता हुन्छ, त्यहीँको कागजात र प्रमाणअनुसार नै प्रक्रिया अघि बढ्ने हो, एकै प्रकृतिको कसुरमा एकै चरणमा अनुसन्धान भए पनि गाभ्न मिल्दैन,’ उनले भने ।
स्थानअनुसार प्रमाण फरक–फरक हुन सक्ने भएकाले मुद्दा गाभ्न नमिल्ने उनले बताए । अहिलेसम्म पक्राउ अनुमति लिइएका र अनुसन्धान गर्नुपर्ने देखिएका अन्य व्यक्तिविरुद्ध पनि रूपन्देही जिल्ला अदालतमा मुद्दा दर्ता गर्ने तयारी रहेको राठौरले जानकारी दिए।
जिल्ला न्यायाधिवक्ता प्रेमराज पौडेल, इलाका प्रहरी कार्यालय बुटवलका डीएसपी विजयराज पण्डित, जिल्ला प्रहरी कार्यालयका अनुसन्धान अधिकारीहरू लगायतको उपस्थितिमा उनको बयान गरिएको हो ।
जिल्ला न्यायाधिवक्ता प्रेमराज पौडेल मुलकुी फौजदारी कार्याव्यवस्थाको दफा १६ मा अनुसन्धान अधिकारीले सरकारी वकिल समक्ष वयान लिने व्यवस्था अनुरुप बयान लिन यहाँ अनुसन्धान अधिकारीले उपस्थित गराएको बताए ।
पोखराको सूर्यदर्शन सहकारीको रकम हिनामिनामा संलग्न रहेको आरोपमा पक्राउ परेका लामिछानेमाथि बुटवलस्थित सुप्रिम सहकारीको रकमसमेत हिनामिनामा संलग्न रहेको आरोप छ ।
जिल्ला प्रहरी कार्यालय कास्कीको हिरासतमा रहेका उनलाई सूर्यदर्शन सहकारीमा अनुसन्धान सकिएकाले सुप्रिमका लागि लामिछानेलाई मंगलबार रुपन्देही ल्याइएको हो ।
रुपन्देही जिल्ला अदालतले रवि लामिछाने र छविलाल जोशीसहित १२ जनाविरुद्ध यसअघि नै पक्राउ पूर्जी जारी गरिसकेको छ । प्रहरीले बुटवलस्थित सुप्रिम ऋण तथा बचत सहकारी संस्थाको १४ करोड २९ लाख रुपैयाँ गोर्खा मिडिया नेटवर्क प्रालिमा लगेर खर्च गरेको कसुरमा अनुसन्धान गरिरहेको छ ।
बुटवलस्थित सुप्रिम सहकारीबाट एक करोड ९६ लाख रवि लामिछानेकै नाममा र १४ करोड २९ लाख रुपैयाँ विभिन्न व्यक्तिमार्फत गोर्खा मिडिया नेटवर्कमा पुगेको संसदीय छानबिन विशेष समिति र प्रहरीको प्रतिवेदनमा उल्लेख छ ।
रुपन्देही ल्याएसँगै रास्वपा र सहकारी पीडित दुवै पक्षले प्रदर्शनको गरिरहेका छन् । सुप्रिम सहकारी पीडितले उनलाई बयान लिने सरकारी वकिलको कार्यालय तथा जिल्ला अदालत परिसरमा वरिपरि प्रशासन निषेध गरी बयान जारी राखेकोले विरोध प्रदर्शन पनि भइरहेको छ ।
नागरिक पोष्ट
