युरोपेली शहरमा पर्यटककको ओइरो, व्यवस्थापन गर्न सरकारको पर्यटक करबढाउने निर्णय

काठमाडौं : युरोपका विभिन्न शहरहरु अत्यधिक पर्यटकका कारण दिक्क हुन थालेका छन् । ठूलो संख्यामा पर्यटकहरु भित्रिन थालेपछि युरोपका विभिन्न शहरहरुले नियन्त्रणका लागि अनेक उपायहरु अपनाउन थालेका छन् । 
यसैक्रममा, ‘ओभरटुरिजम’ नियन्त्रणका उपायहरु घोषणा गर्ने इटालीको मिलान पछिल्लो युरोपेली शहर बनेको छ ।थेग्न नसक्ने गरी पर्यटक आउन थालेपछि युरोपको फेसन राजधानी मिलानले अबेर रातीसम्म हुने गतिविधि कम गर्ने लक्ष्यसहित नयाँ नियमहरु प्रस्ताव गरेको छ । मिलानले साताका दिनहरुमा राती १२ः३० बजे र सप्ताहन्तमा राती १ः३० बजेपछि पिज्जा र आइसक्रिम बिक्रीमा प्रतिबन्ध लगाउने, साथै रेस्टुरेन्ट र बारहरुको बाहिरी क्षेत्र बन्द गर्ने समय तालिका लागू गर्ने तयारी गरेको छ ।
हालैका वर्षहरुमा विशेषगरी ग्रीष्म ऋतुमा न्यानो मौसम र बलौटे समुद्री तटहरु खोज्ने पर्यटकहरुको आगमन अभूतपूर्व स्तरमा पुगेका कारण युरोपले विभिन्न चुनौतीहरुको सामना गरेको छ । सन् २०२३ को ग्रीष्म ऋतुमा ग्रीसमा १ करोड ६९ लाख पर्यटकहरुको भित्रिएपछि नयाँ कीर्तिमान कायम भएको थियो । पर्यटकहरुको आगमनमा उच्च वृद्धिले युरोपभरका गन्तव्यहरुलाई अत्यधिक भीड व्यवस्थापनका विभिन्न उपायहरु लागू गर्न प्रेरित गरेको थियो ।ग्रीसका अधिकारीहरुले पर्यटकहरुको अत्याधिक भीड नियन्त्रण गर्नका  लागि धेरै परीक्षणहरु लागू गरेको छ ।
 एक्रोपोलिस शहरमा नयाँ टाइम स्लट प्रणालीले प्रवेशको लागि लामो लाम र घण्टौं लामो प्रतीक्षा समय घटाउने लक्ष्य राखेको छ । ग्रीस सरकारले देशको रमणीय समुद्री किनारहरुमा भीड कम गर्न प्रतिबन्धहरु पनि लागू गरिरहेको छ । यससँगै, संरक्षित समुद्र तटहरुको सूची जारी गर्दै त्यहाँ बार र रेस्टुरेन्टहरुको संख्यामा सीमा तोकेको छ ।