७ कार्तिक २०८१, बुधबार
श्रीलंका, भारत र नेपालको संयुक्त आयोजनामा बुद्ध जयन्तीका दिनबाट ‘हार्टफुलनेस राइड’ (त्रिपक्षीय बाइक एक्सपिडिसन) सञ्चालन हुने भएको छ ।
बाइक राइड नेपालको लुम्बिनीबाट सुरु हुनेछ । यो अभियान भारत हुँदै अधिकांश धार्मिकस्थल गोरखपुर, कुशीनारा, सारनाथ, वैशाली, नालंदा, बोधगया, राजगिरि, कोलकाता, काराकोरम, बालाशोर, रत्नागिरी, ओडिसा, उदयगिरी, विशाखापट्टनम्, मछलीपट्टनम र चेन्नईसम्म पुग्नेछ।
यो अभियान श्रीलंका छिरेपछि जाफना, मिहिन्ताले, अनुराधापुरा, मटाले, क्यान्डी महियाङ्गना, एला, कटारागामा, मातारा, गाले केलनियातर्फ र कोलम्बोमा समापन गर्ने कार्यक्रम छ।
यस हार्टफुलनेस राइडमा तीन फोर्सको प्रतिनिधित्व गर्ने १५ राइडर्सले भाग लिनेछन् । १०० युवा पुरुष र महिला श्रीलंका भ्रमणमा सहभागी हुनेछन् ।
नेपालको तर्फबाट यसको नेतृत्व स्ट्राटेजिक रिसर्च एण्ड एनालिसिस सोसाइटिज नेपालका सीईओ नवराज लम्सालले गर्नेछन् ।
उनको नेतृत्व र पहलमा लुम्बिनीदेखि कोलम्बोसम्म शान्ति, विकास, युवा मामिलालाई प्रोत्साहन र पर्यटन प्रवर्द्धन गर्ने यस कार्यक्रम २२ मेदेखि १५ जुन २०२४ अर्थात जेठ ९ गते बाट असार १ गतेसम्म सञ्चालन हुनेछ ।
श्रीलंका आर्मी, भारतीय आर्मी र नेपालको सशस्त्र प्रहरी अधिकृतहरू ५र५ जना गरी १५ जना राइडरहरूले त्रिपक्षीय बाइक अभियानमा बुद्ध सर्किटमा शान्तिको कामना गर्दै मैत्रीपूर्ण यात्रा तय गर्नेछन् ।
नेपालको युवा तथा खेलकुद मन्त्रालय, पर्यटन मन्त्रालय र लुम्बिनी विकास कोषको संयुक्त पहलमा बुद्धको जन्मस्थल लुम्बिनीबाट बुद्ध जयन्तीको दिन बिहानै प्रधानमन्त्री पुष्पकमल दाहाल प्रचण्डले नेपाली राष्ट्रिय झन्डासहित बिदाई गर्ने कार्यक्रम छ ।
कार्यक्रमका नेपाल प्रमुख लम्सालले सबै पक्षलाई समेटेर अघि बढ्न सकेकोले यति ठूलो कार्यक्रम सम्पन्न हुन लागेको बताएका छन् ।
बौद्ध पर्यटनमार्फत् लुम्बिनीसँगै समग्र नेपालको विकासमा यो कार्यक्रम कोशेढुङ्गा हुन सक्ने लम्सालको बुझाइ छ ।
शान्ति, विकास, युवा मामिलालाई प्रोत्साहन र पर्यटन प्रवर्द्धन गर्न कार्यक्रम आयोजना गरिएको तीनै देशका आयोजकले बताएका छन् ।
नागरिक पोष्ट
