आत्मनिर्भर अर्थतन्त्रका लागि कृषि व्यवसायमा सकृय दिपक प्रसाद न्यौपाने

दिपक प्रसाद न्यौपाने कृषि अभियन्ता साथै उद्यमी व्यवसायी हुनुहुन्छ । वि. स. २०३६ साल साउन २५ गतेको दिनमा पाल्पा जिल्ला स्थित जाल्पा गा.वि.स. मा उहाँको जन्म भएको हो । पिता बुद्धिसागर न्यौपाने र माता टिका कुमारी न्यौपानेका तीन भाई छोरा र एक छोरी अर्थात कुल चार सन्तान मध्येमा उहाँ माईला हुनुहुन्छ । उहाँ हाल स्थायी रुपमा बर्दघाट न.पा. ४, नवलपरासी साथै टोखा न.पा. वडा नं. ७, काठमाडौंमा बसोबास गर्दै आउनुभएको छ । न्यौपानेले व्यवस्थापन संकाय अन्तर्गत वि.वि.एस. सम्मको अध्ययन पुरा गर्नुभएको छ । अध्ययन गर्दै शिक्षण पेशा र विभिन्न उद्योग, संघसंस्था गरि १० वर्ष सम्म जागिरे जीवन व्यथित गर्नुभए पस्चात उहाँ विगत १५ वर्षदेखी व्यापार व्यवसायमा सकृय रहदै आउनुभएको छ । आँफै केही गर्नुपर्छ भन्ने भावनाका साथ आफू व्यापार व्यवसायमा होमिएको उहाँ बताउनुहुन्छ ।त्यसो त यस माझमा उहाँले उद्योग, ट्रेडिङ्ग (मार्ट), आयात र कृषिसँग सम्बन्धीत उत्पादन, बिक्री वितरण जस्ता उद्योग व्यापारको क्षेत्रमा आफूलाई स्थापित गराउन सफल हुनुभएको छ ।

कृषि कर्मदेखी आयातित सामानलाई नेपाली कच्चा पदार्थबाट उत्पादन गर्ने सम्मका काममा उहाँले हात हाल्नुभएको छ । न्यौपाने आधा दर्जन जति व्यापारिक तथा व्यवसायीक संस्थाहरुमा आवद्ध हुनुहुन्छ । उहाँ एन.सि. एग्रोटेक इण्ष्स्ट्रीज प्रा.लि., कृषक ग्रुप प्रा.लि., लक्ष्य नेपाल ट्रेडिङ्ग प्रा.लि. र एच एम इण्डष्ट्रीजका संस्थापक सञ्चालक हुनुहुन्छ । वित्तियतर्फ उहाँ हिमालचुली कृषि सहरकारी संस्था लिमिटेडमा उपाध्यक्ष पदमा आसिन हुनुहुन्छ भने सांगठनिक रुपमा राष्ट्रिय कृषि तथा व्यापार व्यवसाय संघसंस्थाहरु मार्फत सल्लाहकार तथा पदाधिकारी रही योगदान पुर्याउदै आउनु भएको छ ।

आफना उत्पादनहरु नेपालका विभिन्न शहर स्थित होटल, रेष्टुरेन्ट, वैङ्वेट तथा क्याटरिङ,रिर्सोट र स्टार होटलहरुमा सहजरुपले आपुर्ति हुँदै आएको उहाँ बताउनुहुन्छ । देशलाई कृषिमा अत्मनिर्भर बनाउदै उत्पादनशिल क्षेत्रमार्फत अर्थतन्त्रलाई टेवा पुर्याउने उदेश्यका साथ आफु लागिपरेको न्यौपानेको भनाई छ । त्यसो त उहाँले कृषिलाई पहिलो प्राथमिकता दिदै देशको अर्थतन्त्रलाई सबल बनाउने र स्वदेशमै स्वरोजगार भई करिब २०० जनालाई निरन्तर रोजगार दिदैं आउनु भएको पनि छ । उहाँ सम्बद्ध कम्पनीले नेपाललाई सिंकामा आत्मनिर्भर तुल्याउनुका साथै ठुलो स्केलमा च्याउ लगायतका कृषि उपज उत्पादन गरि उत्पादनशिल क्षेत्रमार्फत राष्ट्र सेवामा विशिष्ठ योगदान पुर्याउदै आएका छन् ।

समाज प्रति उत्तरदायि भई विभिन्न संघसंस्थाहरु मार्फत तथा व्यक्तिगत रुपमा पनि उहाँ मानवसेवा, सामाजिक तथा धार्मिक कार्यमा विगत लामो समय देखी निकै सकृय हुनुहुन्छ । न्यौपानेले व्यवसाय तथा समाज सेवामार्फत पुर्याउदै आउनु योगदानको कदर गर्दै विभिन्न सामाजिक संघ संस्था तथा निकायहरुले उहाँ लाई सम्मान समेत गरेका छन् । यस माझमा उहाँ राष्ट्रिय कृषि सेवा २०८०,राष्ट्रिय सेवा २०८० सम्मान लगायत विभिन्न सामाजिक संघसंस्थाहरुबाट पटक पटक सम्मानीत हुनुभएको छ ।