प्रशोधित खानेकुरा स्वास्थ्यका लागि हानिकारक हुने एक अध्ययनको निष्कर्ष

नागरिक पोष्ट

आईतवार, ११ चैत्र २०८०

6478 views

प्रशोधित खानेकुरा स्वास्थ्यका लागि हानिकारक हुने एक अध्ययनको निष्कर्ष

अति प्रशोधित खानेकुराका कारण ह्दयघात, मोटोपना, मधुमेह, निद्रामा समस्या, डिप्रेसन, क्यान्सर लगायतका स्वास्थ्य समस्या आउने एक अध्ययनले देखाएको छ । विश्वका ९९ लाखभन्दा धेरै मानिसबाट सूचना सङ्कलन गरेर ब्रिटिश मेडिकल जर्नलमा प्रकाशित अध्ययन प्रतिवेदनले अतिप्रशोधित खानेकुराको असर स्वास्थ्यसँग देखाएको हो ।

यस्ता खानेकुराले मुख्यगरी मुटुमा समस्या ल्याउनका साथै मोटोपना बढाउँदा अरु समस्या थपिने गरेको पाइएको छ । प्याकिङ गरिएका कुनै पनि खानेकुरामा पाँचभन्दा बढी सामग्री मिसाएको छ भने त्यसलाई अति प्रशोधित खाना भनिन्छ । अति प्रशोधित खानेकुरामा प्राय: धेरै नुन, धेरै चिनी र स्याचुरेटेड फ्याट हुन्छ । यस्ता खानेरालाई आकर्षक र स्वादिलो बनउन रंग र तथा अप्राकृतिक स्वाद तथा लामो समय नबिग्रियोस भनेर केमिकलको प्रयोग हुन्छ ।

मिठाइ, पेय पदार्थ, पाउरोटी, केक, कर्नफ्लेक्स, चिप्स तथा चाउचाउहरु लगायत प्याकेट बन्द गरिएका तयारी खाना अति प्रशोधित खाना हुन् । सामान्यतया यी खानेकुरा भान्सामा सजिलै तयार हुँदैनन् । अति प्रशोधित खानेकुराले विशेषगरी बालबालिकालाई बढी असर गर्ने हुँदा यसबारेमा जनचेतना र रोकथामका लागि सरकारी प्रयास पनि आवश्यक हुने विज्ञहरु बताउँछन् ।