युवा स्वरोजगार कार्यक्रमको बजेट स्थानीय सम्पदा संरक्षणमा

मुस्ताङ । मुस्ताङको घरपझोङका प्राकृतिक तथा जैविक सम्पदाको संरक्षण, सम्बद्र्धन र प्रर्वद्धन गर्ने काममा पालिकाले युवालाई खटाइएको छ ।

स्थानीय युवा गाउँकै प्राकृतिक तथा जैविक सम्पदा जोगाउन जुटेका छन् । गाउँघरका बेरोजगार युवालाई अल्पकालीन रोजगार सिर्जना गर्ने उद्देश्यले सङ्घीय सरकार र विश्व बैङ्कबाट प्राप्त बैदेशिक सहायताको सदुपयोग गरिएको हो ।

प्रधानमन्त्री रोजगार कार्यक्रममार्फत युवाको सीप र क्षमता अभिवृद्धि गर्ने, स्थानीय प्राकृतिक सम्पदाको अपनत्व दिलाउने, न्यूनतम रोजगार उपलब्ध गराउने र बेरोजगारी समस्यालाई न्यूनीकरण गर्दै लैजाने सरकारको उद्देश्य रहेको गाउँपालिकाका रोजगार सेवा केन्द्रका संयोजक शर्मिला श्रीसले जानकारी दिइन् ।

कार्यक्रमले पालिकाभित्रको जीर्ण अवस्थामा रहेका प्राकृतिक सम्पदालाई संरक्षण तथा विकास गर्न टेवा पुगेको रोजगार सेवा केन्द्र संयोजक श्रीसको भनाइ छ ।

प्रधानमन्त्री रोजगार कार्यक्रमअन्तर्गत चालु आर्थिक वर्ष २०८१/८२ का लागि सङ्घीय सरकारबाट ११ लाख ४९ हजार र वैदेशिक सहायताबाट ३० लाख ४० हजार गरी ४१ लाख ८९ हजार रुपैयाँ पुँजीगत बजेट विनियोजन भएको छ ।
गाउँपालिकाले प्रधानमन्त्री रोजगार कार्यक्रमअन्तर्गत स्थानीय बेरोजगार अवस्थामा रहेका युवायुवतीलाई पर्यटकीय पदमार्ग स्तरोन्नती, छप्पनी ढुङ्गा मिलाउनेदेखि बिच्छ्याउनेसम्म, सिँचाइ कुलो मर्मत सुधार, रैथाने बाली वृक्षरोपण, सरसफाइ तथा कृषि गह्रा सुधारलगायतका काममा परिचालन गरेको रोजगार सेवा केन्द्र संयोजक श्रीसले बताइन् ।

प्रधानमन्त्री रोजगार कार्यक्रमअन्तर्गत चालु आवमा गाउँपालिकाका पाँच वटै वडामा युवालाई रोजगारमूलक काममा व्यवस्थापन गरिएको छ । त्यसअन्तर्गत वडा नं १ को छैरो चिमाङ गाउँमा छप्पनी ढुंगा बिच्छ्याउने, सिँचाइ कुलो मर्मत सुधारका साथै पर्यटकीय पदमार्ग मर्मत सम्भार लगायतका कामहरूको जिम्मेवारी दिइएको छ ।

वडा नं २ मार्फामा सिँचाइ कुलो मर्मत सम्भार, परम्परागत बालीको वृक्षरोपण तथा त्यस क्षेत्रको सरसफाइका साथै खेतबारीको कृषि गह्रा सुधारको कामकाजमा खटाइएको हो । वडा नं ३ स्याङ गाउँमा सिँचाइ कुलो मर्मत सम्भार गरिँदै छ ।

यसैगरी गाउँपालिकाको वडा नं ४ जोमसोममा धोफु (ढुङ्गे ओढार) जाने सडक बाटो मर्मत सम्भार सुरु गरिएको छ ।

वडा नं ५ ढुम्बा गाउँअन्तर्गत ढुम्बा गाउँदेखि कुछप तरेङ्गा गुम्बा जाने जीर्ण बाटो मर्मत सम्भार भइरहेको छ । सोही वडाको भुतीधाङस्थित वृक्षरोपण क्षेत्रमा सरसफाइका साथै पार्क निर्माण तथा मर्मत सम्भार लगायतका काम भइरहेको छ ।

प्रधानमन्त्री रोजगार कार्यक्रमअन्तर्गत बेरोजगार युवाहरूलाई १०० दिनसम्म दैनिक ७ सय ६० रुपैयाँ ज्याला सुविधा दिएर स्थानीय सम्पदा जोगाउन काममा खटाइएको रोजगार शाखा संयोजक श्रीसको भनाइ छ ।

उनीहरूलाई दैनिक आठ घण्टा काममा लगाउने गरी सम्बन्धित वडामा त्यहीँका युवायुवतीलाई व्यवस्थापन गरिएको उनले जानकारी दिइन् ।

चालु वर्षको कार्यक्रममा गाउँपालिकाको रोजगार शाखा केन्द्रले पालिकाको पाँच वटै वडामा गरी ५५ युवायुवती व्यवस्थापन गरेको रोजगार सेवा केन्द्र संयोजक श्रीसले बताइन् ।

यसैगरी रोजगार कार्यक्रममा सहभागी युवयुवतीलाई फिल्डमा काम गर्दा जोखिम उत्पन्न नहोस् भन्ने हेतुले आवश्यक सुरक्षा सामग्रीका साथै काम गर्ने घरेलु उपकरणको समेत व्यवस्था गरिएको उनको भनाइ छ ।

कार्यक्रमअन्तर्गत गाउँपालिकालाई गत वर्ष रोजगारी सिर्जना गर्ने गरी सङ्घीय सरकारबाट २१ लाख ४९ हजार रुपैयाँ र वैदेशिक ऋण सहायता २८ लाख ५८ हजार रुपैयाँ बजेट विनियोजन भएको थियो । गत वर्ष घरपझोङको रोजगार सेवा केन्द्रले पाँच वटै वडामा गरी ६५ जनालाई अल्पकालीन रोजगारी उपलब्ध गराएको थियो ।