नागरिक पोष्ट
बुधबार, ३० जेष्ठ २०८१
4421 views
4421 views
काठमाडौं । चिनियाँ रक्षामन्त्री डोङ जुनले ‘उत्तेजक र आधारहीन’ अभिव्यक्ति दिएको भन्दै ताइवानले आपत्ति जनाएको छ ।
मुख्यभूमि मामिलासम्बन्धी ताइवानी परिषद्ले ताइवानका बारेमा चिनियाँ रक्षामन्त्रीले उत्तेजक र आधारहीन अभिव्यक्ति दिएको जनाएको हो ।
रक्षामन्त्री डोङ जुनले सिंगापुरमा आयोजित शाङ्ग्री–ला सुरक्षा वार्तामा ‘ताइवानलाई चीनबाट अलग गर्न चाहने जो कसैको पनि विनाश हुने’ अभिव्यक्ति दिएका थिए ।
रक्षामन्त्रीको यो भनाइले संयुक्त राष्ट्रसंघको बडापत्रको उल्लङ्घन गर्ने र एसिया प्रशान्त क्षेत्रको शान्ति र सुरक्षामा असर पार्ने ताइवानको मुख्यभूमि मामिला परिषद्ले उल्लेख गरेको छ ।
भारतीय समाचार संस्था एएनआईका अनुसार चिनियाँ रक्षामन्त्रीको उक्त अभिव्यक्तिबाट राष्ट्रसंघको धारा २ को अनुच्छेद ४ उल्लङ्घन भएको परिषद्ले जनाएको छ । उक्त धारामा सदस्य राष्ट्रलाई शक्तिको प्रयोग गर्न वा धम्की दिन बन्देज लगाइएको छ ।
‘चिनियाँ कम्युनिष्ट पार्टीका अधिकारीले यस्तो किसिमको उत्तेजक र आधारहीन अभिव्यक्ति दिनु निकै दुर्भाग्यपूर्ण छ’, परिषद्ले भनेको छ ।
स्वायत्त शासन चलाउँदै आएको ताइवानलाई कम्युनिष्ट शासन रहेको चीनले आफ्नै मुलुकको एक हिस्सा मान्दै आएको छ र आवश्यक परे बल प्रयोग गरेर भएपनि मुख्यभूमिमा गाभ्ने चेतावनी दिँदै आएको छ ।
